Buaina karah Liverpool chuan neitu thar hmel a hmu mek

Sum lamah nasa takin an tlachhia. Club thuam that nan The Royal Bank of Scotland ah sum tam tham tak an puk a. Sumdawnna leh khelmual chhungah result an nei tha thei chuang lo, a tlaran zawngin an kal mek. October 15, 2010 hian an sum puk hi rulh vek a ngai tawh dawn, heta an rul theilo a nih chuan RBS hian Liverpool hi a take over dawn tawh si a. 

Hetia an buai em em lai hian Liverpool Board of Directors zinga mi pathum Purslow, Ayre leh chairman Martin Broughton te chuan April thla atang khan Liverpool hi an lo zuar tawh a, a tirah chuan pound mtd 800 lai an chhiar, mahse a to mah mah niin a lang, hralh na an hmu mai lo. A man an chhiar hniam hnuah New England Sports Ventures (NESV) te an rawn lang ta a, anni hian Pound mtd 300 in an rawn chhang ta a. 

Board member pathumte hi chuan hei hi an pawm ta thlap a, Liverpool chu hralh mai tura buatsaih a nih laiin, Liverpool Club a share nei tam pahnih, a neitu tak tak an ni mai ang chu George Gillett leh Tom Hicks te chuan hei hi an pawm thei ta hauh lo mai. An hritpuina leh pawmpuina pawh tel lova hetia club hralh an lo tum ve ringawt chu an lawm lova, heng borad member pathum te hi an ban ta a. An aiah Hick-a fapa Mack chu dah a ni ta a. Gillett leh Hicks te chuan Club leiba Pound mtd 351.4 a nih mek laia hetia Pound mtd 300 leka club hralh tum a nih hi an duh lo em em.

Hetih lai hian board member pathum te pawh an ngawi mai mai bik lo, dan thiam te ruaiin theih tawka an nihna chelh leh theih an tum a, tunah hian Liverpool chu khelmualah leh Club chhungkua ah nasa takin a buai a ni.

New England Sports Ventures in Pound mtd 300 a club lei an tumna Liverpool board member ten an lo pawm tawh si avang hian NESV chu club neitu ni mai thei an ni ta. America rama Baseball team  tha Boston Red Sox neitu NESV hian thuchhuah siam ve nghalin, "Kan indawrna hi a hlawhtling a nih chuan club kan lei tumna hian leiba rul zo dawnlo mahse a bak pawh hi kan rul tho tho ang, hma thlir thui tak kan nei a, Liverpool Club tana nakina la chhenfakawm tur te a ni hlawm. Liverpool FC hi tunah dinhmun thalo takah a ding mek, hei hi chhan chhuah a, a ropuina ngaia let tir leh chu kan tum hmasa ber tur a ni. Boston Red Sox kan lei hnua kan hnathawh hi en ula,Kum ruk chhungin World Series vawi hnih kan la hman a, Liverpool pawh hi kan tungding leh thei ang tih kan hria a ni", tiin Liverpool lei ngei an tum thu an sawi. 

Hetih lai hian tuna neitu la ni mek Hicks leh Gillett te chuan leiba Pound mtd. 351.4 an neih mek laia pound mtd 300 leka club hralh a nih tur chu an duh lo em em a, theih tawk chhuah a dan an la tu a ni, an ni hi chuan Pound mtd 600 hi liverpool hlutna a ni tiin, hetia tlawm taka hralh a nih dawn chuan chu chu  Liverpool hmuhsitna ang hiala an ngaih thu an sawi bawk. Hetih lai hian Liverpool Chairman Martin Broughton chuan Tun kar hian engkim an peihfel hman a rin thu a lo sawi ve mek bawk a. RBS a an ba October ni 15 a tlak ngei ngei tur an nih avangin Club hralh hi an tihmakmawh a nih thu a sawi bawk.