Zanin Europa Cup thlirlawkna

Manchester City vs Juventus

UEFA Champions League Matcheday 2 chu  nizan khan  khelh zawh a ni. A hnuai chiah EUROPA League chu zanin hian khelh chhunzawm a ni ve leh dawn.Zanin hian Manchester City chuan Juventus an mikhual dawn a. Defender Micah Richards chu a rawn kir leh thei ta a, hetih lai hian Shaun Wright Phillips chu a khupah hliam a tawrh a vangin a tel theilo maithei. Striker Bolatelli pawh a khup a tih hliam avangin a khel thei dawn lova. Novermber thla velah a rawn kir leh theih beisei chauh a ni.

Italian League team tha Juventus coach pawh lo ni tawh Mancini chuan, English Premier League chu Serie A aia a that zawk thu sawiin, a tet lai atanga a tan thin Juventus nen kher a an intum tur chu thil nuam tak a ni lem lo a ti bawk. "Mahse football chu hetiang tur hi a ni a lawm, chutih laiin Juventus hi ka hmelma a ni ngai lo, ka naupan tet ata ka tan a ni a, player te leh he club hi ka zah em em a ni. Ka tan chuan hun chhinchhiahthlak tak a ni dawn. Nia.. Ka club hlui leh kan khua chu ka ngai khawp mai, amaherawh chu hetah hian ka hlim a, tin, ka hnathawhna a ni bawk a, nuam ka ti a ni Manchester hi", tiin an inkhelh tur chungchang a sawi.

FC Utretcht vs Liverpool

Liverpool chuan Holland ramah FC Utrecht an va tum dawn a, an thiam puipa Steven Gerrard chu hahchawlh a mamawh avangin a zin ve dawn lo a, Daniel Agger pawh inhliam avangin a kal thei dawn lo a ni.

Torres chu a fit tha tawk a, squad ah pawh a tel a, Konchesky leh Fabio Aurelo te pawh inhliam vangin an tel thei dawn lo. Hetih lai hian Sunderland nen 2-2 a an in draw na game a khel ve thei lo Kuyt chuan a club hlui hi a hmachhawn ve thei dawn a, a club hlui chungchang sawiin " Professional ka nih theih nana hun tha min siam sak tu a ni a, tunah chuan player khete chu ka hre vek tawh lo maithei, pa hnih pathum vel chu an la awm ang. Mahse Ka club hlui hmuh leh hi ka chak em em a ni", a ti.