Valencia hnehtu Hernandez

English Club te hi Spain ramah record an nei tha ngai lo. Mestalla Stadium ah pawh hian tlang nel takin an khel lo a ni tih a lang chiang mai. Valencia hi Laliga hruaitu an ni a, United hi Premier League ah pahnihna an ni. 

Ram pahnih team tha ve ve an ni a, an inhlau tawn tih pawh an game ah a lang. Clear chance an nei tam lo ve ve a, midfield ah an in khel nasa a, tin, ball ho tak tak a pass, in pass thelh pawh a tam bawk.Valencia hi an work rate a tha zawk a, gap pawh an hnawh khat zung zung a, heivang hian United pawhin passing game an khel tak tak thei bik lo.

Valencia lamah Soldado a hlauhawm reng a, vawi enge maw zat van darsar a ti buai a ni. United lamah hian Rooney khel thei lo mahse Berbatov chu maltlat tirin, Anderson pawh a rawn dam ve leh ta bawk. Berbatov khan second half a solo ball kha goal ah han chantir selang chuang goal ropui tak a ni ngei ang, Cersar-a'n a lo dan sak hlauh a. 

An inhnehtawk dawn ta niin a lang. Minute 77 naah inhliam damkawr Anderson chu Hernandez chuan a rawn thlak a, Berbatov pawh chu 85 mins ah Machada an a rawn thlak bawk. United lama ball awm chu Nani in a chang a, chak takin Valencia goal lamah a tlan phei pui ta. Lut thar hlim Macheda chu pein, Macheda chuan lei hrulah penalty area pawn hretah chuan Hernandez lak nuam tur chuan a pe chho a, Hernandez chuan tha lutukin a lo la a, defender pahnih inkarah a shot, a sir em avangin Cesar chuan a dang thei ta lo. A goal ta. Valencia hian thei tawk in an nawr let ve leh..mahse hun tam a awm tawh lo. 93 mins ah Referee chuan hun a ham tawp. Manchester united chuan valencia chu an khelmualah 0-1 in an va hneh.

Fergusion khan Macheda kha a rawn luh tir fuh lutuk.. 85 mins a Macheda a rawn luh khan mi tamtak chuan khawnge Owen ?? A ni kha Bolton an draw na goal nalh taka thuntu kha a ni a.. tiin Alex-a an dem.. Mahse Sir Alex chuan a nau chu a hrechiang hle a ni, la naupang deuh mahse thil ti danglam thei a ni tih a hria a, Macheda leh Hernandez a inkawp tir kha a fu thlawt a ni.