Premiership Sunday

Manchester City 0-3 Arsenal

Manchester City lam khan red card an hmu hma lutuk a, inkhel a hmuhnawm tur ang pawhin a hmuhnawm ta lo niin ka hria. Inkhel tan atangin City lam hian an nawr na nghal hle, Arsenal chu an bet deuh zawk niin a lang. Tan atanga minute 1 lekah a goal nghal tep, Tevez a siam Silva in a lo khen kha goal ngat selang chuan goal nalh tak tur a ni.

Arsenal lamin Counter attack an nei a, 4 mins ah Marouane Chamakh ball tlanpui chu penalty area pawn hretah Dedryk Boyata chuan a kalh thlu a, Direct red card referee chuan a pe. Red car hi a awm hlih hliah, Boyata pawh hian phu a in ti a, engmah sawi buai lovin a chhuak. Red cad a hmu hma em a, a pawi ka ti, game a hmuhnawm dawn vei nen. He game hi a physical hle, card pawh an inhmuh chhawk zak zak. 20 mins ah a tam zawl Arsenal chuan Nasri hmangin goal an thun a, 39 mins ah Kompany chuan Fabregas a tihtluk avangin Penalty an chawi. Fabregas chuan petin, mawi takin Joe Hart chuan a lo dang. First half ah goal a luh beh lo.

City hi an that em avangin a tam zawk Arsenal pawh hian goal an thun thei mai bik lo, an innawr tawn zak zak a, City atangin Silva leh Tevez chu an khel tha chungchuang a, 65 mins ah Huth dan per chu chiang mangkhengin Alex Song chuan goal ah a thun leh. 2-0 in Arsenal hian hma an hruai ta. Tevez a inhliam a. Adebayor a rawn lut... a hnawk hle. 87 mins ah substitute Bendtner chuan Arsenal goal thumna a rawn thun, mikhual khuaah Arsenal hi 0-3 in an va chak a, League table ah 2 naah an inhlangkai ta.

Liverpool 2-1 Blackburn

Anfield inkhel hi a hmuhnawm khawp mai.  Liverpool hian goal an thun hmasa a, 48 mins ah Corner atangin Kyriakos chuan Liverpool hmahruaina goal a thun. First Half ah goal dang a luh belh lo.

Second half an tan a, 50 mins ah Diouf chuan na vak lovin angle tawt tak kar atang chuan a pet a, defender in pet chhuah a tum chu Carragher lu ah a per, an lamah a goal ta, 1-1 a ni. he goal a luh hnu minute 3 lekah Joe Cole cross chu Torres chuan chiang takin a tauh lut, Liverpool hian 2-1 in hma an hruai ta a, goal dang a luh belh lo. Relegation zone atangin an la talchhuaklo na a, hetianga an khel chho zel dawn a nih chuan relegate chu a hlauhawm lohvang.

Stoke 1-2  Manchester United

Javier Hernandez head goal dan kha a mak thlawt, sega football kan khelh thin laia tukhuma kawh deuha kan head goal te kha min ti hrechhuak. Hetianga head goal hi football ka en tawhah ka la hmu ngai lo. Grass a nal nge, a tu zawk zawk pawh khan ball an pass sual deuh reng a, Stoke lam hian tharum an ngah zawk. 27 mins ah Nani corner pet chu farpost atangin Vidic chuan 6 yard box ah a rawn tauh lut a, Javier Hernandez chuan a tukhumin mak leh dangdai takin a tauh lut. 0-1 in United hian hma an hruai. First Half ah goal dang a luh belh lo.

Second half tan a ni, clear chance an nei lo ve ve, 66 mins ah Striker che tha lo Walters chu Sanil chuan a rawn thlak a, hepa ngei hian 81 mins ah goal nalh lutuk a thun. dinglam sir atangin ball a laluta, Evra a bum, a veilam chuan a thuai ta a, van der sar tan khawih phak a ni lo. Goal nalh tak a ni. Goal dinhmun chu 1-1 a ni a, United hian an chindan pangaiin an draw leh mai dawn emaw tih laiin, Javier Hernandez bawk chuan Evra siam chu pen 4 vel lek atangin a thun leh ta. 86 mins a hmahruaina goal a thun hnu hian goal dang a luh belh ta lo. United chu khual khuaa an tun season a an chak vawikhat nan 1-2 in Stoke an hneh ta a ni. Hetih lai hian Gary Neville hnawhchhuah a ni lo kha United vanneih na a ni.