Edwin Van der Sar a chawl tawh dawn

Manchester United goalkeeper Edwin van der Sar chuan tun season zawhah hian chawlh a tum thu United goalkeeping coah Eric Steele a hrilh.

Holland goalkeeper thin hi 2005 khan Fulham atangin United hi a zawm a, tun thla October ni 29 hian kum 40 a tling ve dawn ta der mai a. Game level sang tak khelh reng chu a tlin a ring ta lo niin a lang. Steele chuan " Edwin van der Sar hian a rilru chu a siam fel tawh a, tun season tawp hian chawlh a tum a ni. Proffesional dik tak a ni a, a fingin goalkeeper tha tak a ni. A chawlh hun tur hi keini Sir Alex a nen chuan sawi sak kher a ngai lo, amah  hian hun a tih hunah a chawl mai ang, achhan chu a taksa hrechiangtu a ni a", tiin Edwin van der sar a chungchang a sawi.

Hetih lai hian Steele hian an keeper chhuanvawr chu a ui hle niin a lang a. "2010-11 season hnu lam thleng pawh hian van der sar hi la khel thei a ni, Cup hi la hnem viau tawh mahse khawvela Cup rei leh upa ber FA cup hi a la lalo a, hei hi a ni pawh hian lak ngei a duh a ni", tiin an keeper hi chelh a la duh em em.

Van der sar hian Champions league, League Cup leh league champion cup te a lo la tawh a, club in elna ah chuan FA cup chiah hi hmabak a nei tawh a, chu chu lak ngei a duh dawn a ni. Hetia van der sar chawlh a tum mek lai hian United chuan amah thlaktu tur an dap mek reng bawk a.Juventus keeper Gianluigi Buffon leh Ajax keeper Martin stekelenburg te chu en thlithlai mek an ni.