Chelsea 2-0 Arsenal

Carlo Ancelotti chu a pa vuina hun Italy a an hman zawhin Arsenal hmachhawn leh turin Stamford Bridge ah a rawn kir leh nghal a, a eizawnna a nih miau avang leh he game hi a pawimawh em avangin chawlh a la hman lo a ni. Arsenal hian an player tha Fabregas inhliam vangin an hruai thei lova, a aiah rawlthar, tunlaia rawn che tha chho em em Wilshere chu dahin hmatawngah Arshavin leh Chamakh an inkawp.

Inkhel chu ring lawk ang ngeiin a tang nghal em em. Ball chuan leh lam goal a thleng tawn zak zak a.Drogba leh Anelka te inkawp an hlauhawm viau a, mahse Arsenal defender Sebastien Squillaci leh Sagna ten an lo dang thei hlauh zel. Arsenal tan Wilshere chu a rawn khel tha leh hle, Arshavin-a'n 30 yards atanga a shot Cech an a lo dan phei kha chu pui tak a ni. Arsenal ball khawih a nalh leh hle a, hetih lai hian Chelsea counter attack chu a na em em a, goal pawh an thun teuh thei hle. 38 mins a ni a, Ashley cole chuan lei hrulah veilam atangin a cross a, Drogba chuan near post ah lo tawk kawiin, Arsenal keeper Fabianski  a che hman lo, goal ah a lut ta. First half a zo a, Chelsea hian 1-0 in hma an hruai a.

Second half tan a ni a, Manager pahnih ten game an la siksawi lo, Arsenal in theitawk an chhuah, goal thun an tum. Mahse John terry a khelh that zan a nih mai bakah Arsenal hian an hmatawng tha te an chhar theih loh avangin goal an thun thei lo. 83 mins a ni a, Laurent Koscielny chuan Nicolas Anelka a tih tluk avangin chelsea chuan 25 yards atangin freekick an hmu. defender Alex a rawn ding chhuak a, keeper zawnah kawh takin a pet phei, keeper awmna athlen chuan a leu kawi a, Fabiansky tan khawih phak rual a ni lo. A goal leh ta, Chelsea hian 2-0 in hma an hruai ta a, Arsenal tan tih theih a awm ta lo, hun a tawp zui ta a. Heti hian Chelsea chu League leader an ni chhunzawm zel a,an mahni hnaih bertu Man City lakah points 4 in hma an hruai ta a ni.