Bernabeu ah AC Milan chuan La liga hmahruaitu an rawn luhkhung. Mahse an tum angin thil a kal tluang lo, Ronaldo inhliam rawn dam leh goal thun chak a thaw huam huam chu an dang zo lo a ni ber mai.
Nizan Champions League game ah hian Real hian 2-0 in Milan an lo hneh a, goal hi first half a lut ve ve a ni. Minute 13 ah real chuan penalty area pawn hret atangin free kick an hmu a, Ronaldo hian a pet, a goal chiang hle mai. He free kick a pet dan hi a risk nge, Milan wall te kha an zuang darh dawn tih a hre lawk ve hrim hrim zawk ? Wall karah a pe phei a, goal keeper a che hman lo. Goal nalh tak a ni. A hnu minute khat lekah Ronaldo chuan veilam sirah ball a khalh phei a, a cross thla chu Ozil in a shot, defender a pet per a, keeper a lo dive tawh hman si, ho lam deuh chuan goal ah a lut leh ta mai a.
Second half an khel leh a, goal dang a luh bel lo, Hun a tawp chuan Real hian 2-0 in Milan hi an hneh ta a ni. Game pumpui tlir chuan Real Madrid hi an khel tha zawk a, chak an phu em em. An game a rang a, Milan hian an chelh lo a ni ber. Lehlamah Ac milan tan Ronaldinho chuan tun hma a tluk tawh lo tih a lang chiang hle mai. Ball a keng thei lova, a pass dik thei bawk lo, midfield ah ball an hloh nasat avangin attacking pawh an nei na thei lo a ni.
Real pawh hi an vannei ve deuh chu niin a lang an goal luh dan en kha chuan. Goal hnuhnung phei kha chu dan pial per lut a ni a, minute hnih chhunga goal hnih an chhuah kha Milan tan a pawi em em, insiam that an tum a, an tumpui kha real an lo ni tlat bawk si, Bernabeu ah tlawmzawkah an tang ta a ni/
No comments:
Post a Comment